ເທດສະຫລອງບຸນເຂົ້າປະດັບດິນ
ນະໂມຕັດສະ
ພະຄະວະໂຕ ອະລະຫະໂຕ ສຳມາສຳພຸດທັດສະ (3ເທື່ອ)
”ນິມິດຕັງ ສາທຸລູປັນນັງ ກະຕັນຍູ
ກະຕະເວທິຕາ ສັກກັດຈັງທຳໂມ
ໂສຕັບໂພຕີຕີ”.
ໂພສາທະໂວດູລາສັບປຸລິສະເຈົ້າທັງຫລາຍ
ວັນນີ້ເປັນມື້ເດືອນເກົ້າຂື້ນ,ແຮມ…ຄໍ່າ ຖືໄດ້ວ່າເປັນມື້ທີ່ມີຄວາມຫມາຍສຳຄັນວັນຫນື່ງທາງດ້ານຮີດຄອງປະເພນີອັນດີງາມຂອງລາວເຮົາ,
ຜູ້ທີ່ນັບຖືພຣະພຸດທະສາດສະຫນາເຊີ່ງແມ່ນຫນື່ງໃນຈໍ່ານວນຮິດສິບສອງ
ທີ່ຊາວພຸດເຮົາທັງຫລາຍໄດ້ປະຕິບັດສືບທອດຕໍ່ກັນມາຈົນເຖີງທຸກວັນນີ້
ແລະຍັງຈະສືບທອດຕໍ່ໄປໃນອະນາຄົດ.
ເມື່ອບຸນເຂົ້າປະດັບດີນໄດ້ວຽນມາຮອດທຸກໆປີພໍ່ອອກແມ່ອອກທັງຫລາຍ
ຜູ້ທີ່ນັບຖືພຸດທະສາສະຫນາທຸກເພດທຸກໄວກໍ່ໄດ້ພາກັນເອົາໃຈໃສ່ປະຕິບັດກັນຢ່າງຕັ້ງຫນ້າດ້ວຍຄວາມເບີກບານມ່ວນຊື່ນ,
ຍ້ອນເຂົ້າໃຈວ່າເປັນປະເພນີອັນດີງາມຂອງຕົນ
ຈົນໄດ້ມີຄຳເວົ້າອອກມາວ່າ:
”ຮິດຄອງປະເພນີອັນດີງາມທີ່ມີເອກະລັກສະເພາະ
ແມ່ນຄວາມພູມໃຈຂອງລາວເຮົາ” ແຕ່ສີ່ງທີ່ມີຄວາມຫມາຍແລະສຳຄັນຕໍ່ເຮົາກໍ່ຄື:ເຮົາທຸກຄົນຄວນຄົ້ນຄົ້ວແລະໃຈ້ແຍກໃຫ້ເລິກເຊີ່ງເຖີງປະເພນີອັນນີ້
ເພື່ອຈະໄດ້ປະຕິບັດໃຫ້ຖືກຕອ້ງແລະໄດ້ຮັບຜົນເທົ່າທີ່ຄວນ,
ດັ່ງນັ້ນໃນທຳມະເທດສະຫນາກັນນີ້ຈະໄດ້ນຳເອົາຈຸດປະສົງຂອງຮິດຄອງວັນນີ້ມາຊີ້ແຈງສະແດງເປັນທຳມິກະຖາ
ເພື່ອເປັນແນວທາງປະຕິບັດຂອງຊາວພຸດເຮົາທັງຫລາຍຕາມສົມຄວນແກ່ເວລາ.
ການເຮັດບຸນໃນວັນເຂົ້າປະດັບດິນນີ້
ກໍ່ເພື່ອອຸທິດຫມາຍທານຍາດນ້ຳໄປໃຫ້ແກ່ສັບພະສັດທັງຫລາຍທີ່ລ່ວງລັບໄປແລ້ວມີບິດາມານດາເປັນຕົ້ນ
ຖືໄດ້ວ່າເປັນການສະແດງອອກເຊີ່ງຄວາມກະຕັນຍູກະຕະເວທິຕາຕໍ່ຜູ້ມີພຣະຄຸນ
ເພື່ອເປັນການລະລຶກເຖີງຄຸນງາມຄວາມດີທີ່ພໍ່ແມ່ມີຕໍ່ເຮົາ
ໃຫ້ປາກົດຊັດແກ່ຜູ້ທີ່ຍັງມີຊີວິດຢູ່ ແລະເພື່ອສືບຜົນງານອັນດີງາມນັ້ນໃຫ້ກ້າວໄປຢ່າງບໍ່ຢຸດຢັ້ງ,
ພໍ່ແມ່ນັ້ນສອນລູກດ້ວຍການອົບຮົມບົ່ມສອນ
ປູກຝັງຈະລິດ ນິດໃສໃຈຄໍ ກິລິຍາມາລະຍາດ ແລະຊາດຕະກຸນ,
ພໍ່ແມ່ອາດຈະເວົ້າຄຳດຽວເປັນເດືອນເປັນປີຫລືຕະຫລອດຊີວິດເຊີ່ງບໍ່ມີໃຜສົນໃຈຈະເວົ້າກັບເຮົາໄດ້ດົນປານນັ້ນ,
ເຮົາອາດຈະເບື່ອແລະລຳຄານພໍ່ແມ່ ຢາກຫນີໄປໃຫ້ໄກໆ ແຕ່ວັນໃດວັນຫນື່ງຫາກບ້ານຂາດພໍ່ເຮືອນຂາດແມ່ໄປ
ເຮົາຈະຮູ້ສຶກເຫມືອນຂາດດວງແກ້ວຂອງຊີວິດໄປ
ຄວາມໂສກເສົ້າງຽບເຫງົາຈະຕາມມາ.
ມີຄຳກ່າວໄວ້ວ່າ: ພໍ່ແມ່ຄືພຣະອໍລະຫັນຂອງລູກ
ພໍ່ແມ່ຄືໂຄມທອງຂອງຊີວິດ ຊ່ວຍຊີ້ທິດ ຊ່ວຍນຳທາງ ຊ່ວຍສ້າງສັນ
ໃຫ້ຄວາມຮັກໃຫ້ຄວາມຮູ້ ຊູຊີວັນ ລູກຈົ່ງຫມັ້ນກະຕັນຍູຮູ້ແທນຄຸນ.
ພໍ່ແມ່ນັ້ນເປັນມິດໃນເຮືອນ ເປັນເພື່ອນໃນບ້ານ
ເປັນອາຈານປະຈຳຊີວິດແລະເປັນພົມລີຂິດຊີວິດລູກ
ສີ່ງເຫລົ່ານີ້ລ້ວນແມ່ນພຣະຄຸນອັນຍີ່ງໃຫຍ່ຂອງພໍ່ແມ່ທີ່ຫາອັນປຽບບໍ່ໄດ້.
ສະນັ້ນຂໍໃຫ້ລູກທຸກຄົນດີໃຈເຖີດທີ່ມີພໍ່ແມ່ຢູ່ໃກ້ຕົວ
ໃຫ້ຫມັ່ນດູແລຮັກສາ ທະນຸບຳລູງເອົາໃຈໃສ່ທ່ານ ຢ່າເຮັດໃຫ້ທ່ານເສຍໃຈ
ບອກຮັກແກ່ທ່ານແລະຕ້ອງເຄົາລົບບູຊາທ່ານດ້ວຍຄວາມຈີງໃຈ, ເມື່ອທ່ານຈາກໂລກນີ້ໄປແລ້ວກໍ່ຄວນທຳບຸນອຸທິດໄປໃຫ້
ດັ່ງທີ່ເຈົ້າມູນລະສັດທາທັງຫລາຍເຮັດໃນວັນນີ້ ເພື່ອເປັນການຕອບບຸນແທນຄຸນ,
ຄົນລາວບູຮານເຊື່ອວ່າເຂົ້າເມັດຫນື່ງກໍ່ມີຄ່າ ປາໂຕຫນື່ງກໍ່ມີຄຸນ
ນ້ຳດື່ມຈອກຫນື່ງກໍ່ມີຄວາມຫມາຍຕໍ່ຊີວິດເຮົາຕ້ອງຄິດແທນຄຸນ.
ຄວາມກະຕັນຍູກະຕະເວທີນັ້ນເລີ່ມຕົ້ນທີ່ຄອບຄົວ
ເລີ່ມຕົ້ນທີ່ພໍ່ແມ່ລູກດູແລກັນທົດແທນຄວາມດີໃຫ້ແກ່ກັນແລະກັນ
ແລະຍັງເປັນຕົ້ນກຳເນີດຂອງຄວາມດີທຸກຢ່າງຫມາຍຄວາມວ່າພຽງແຕ່ເປັນຄົນກະຕັນຍູຮູ້ແທນຄຸນກໍ່ຈະມີຄວາມດີອີກຢ່າງຕາມມາແລະຈະເປັນປັດໃຈໃຫ້ເຮົາຈະເລີນກ້າວຫນ້າຢູ່ໃສກໍ່ອຸ່ນໃຈປອດໄພທຸກດ້ານ
ດັ່ງນັ້ນຄຳເວົ້າທີ່ວ່າ: ”ນິມິດຕັງ ສາທຸລູປັນນັງ ກະຕັນຍູ ກະຕະເວທິຕາ” ຄວາມກະຕັນຍູ
ເປັນເຄື່ອງຫມາຍຂອງຄົນດີນັ້ນ ຈື່ງຖືກຕ້ອງທີ່ສຸດເພາະຄົນທີ່ມີຈິດໃຈກະຕັນຍູນີ້ຈະເປັນຄົນມີສະເຫນ
ເຂົ້າໃກ້ແລ້ວຮູ້ສຶກອົບອຸ່ນໃຈ
ດວງຕາແລະສີຫນ້າຈະມີແຕ່ຄວາມເອື້ອອາທອນແລະອ່ອນໂຍນ. ອີກຂໍ້ຫນື່ງກໍ່ຄື:
ຄວາມຄິດຕອບບຸນແທນຄຸນເປັນຄວາມສຸກຄວາມອີ່ມໃຈແລະເປັນອາຫານທິບບຳລູງໃຈຢ່າງຫນື່ງຂອງຊີວິດ,
ອາຫານສຳລັບຮ່າງກາຍນັ້ນເຮົາກິນເຮົາດື່ມທຸກວັນສະນັ້ນເຮົາຄວນຫາອາຫານບຳລຸງໃຈດ້ວຍການຄິດຕັ້ງຈິດຕັ້ງໃຈຕອບບຸນແທນຄຸນພຽງເທົ່ານີ້ເຮົາກໍ່ຈະຫາອາຫານບຳລຸງຈິດໃຈໄດ້ແລ້ວໃນແຕ່ລະວັນ.
ຄວາມສຸກຢູ່ທີການໃຫ້ຂໍໃຫ້ທ່ານທັງຫລາຍພູມໃຈທີ່ໄດ້ໃຫ້ທານໃນວັນນີ້ແລ້ວຈິດໃຈທີ່ສົດໃສຊື່ນບານຈະຢູ່ກັບທ່ານຕະຫລອດໄປ,
ເອວັງກໍ່ສະເດັດບໍລະບວນຄວນເທົ່ານີ້ກ່ອນແລ…ຯຯຯ
No comments:
Post a Comment